Ибратли шеърлар
Кафанга ўранглар тирик чоғимда,
Токи ҳис қилайин ўлим шиддатин.
Нафасим тиқилиб, бўғзим бўғсин-у,
Нафсим унут қилсин дунё лаззатин.
Кафанга ўранглар тирик чоғимда,
Токи англаб етай бойлик фитнасин.
Тупроқ ҳам сепинглар тўймас кўзимга,
Токи кўмиб турсин кўзим ширасин.
Кафанга ўранглар тирик чоғимда,
Қаттиқ ўранг, сиқиб бор танларимни.
Уйқуда кучайиб, тоатда толган,
Дангаса, эринчоқ баданларимни.
Кафанга ўранглар тирик чоғимда,
Борар манзилимга элтиб қўйингиз.
Бу ёруғ дунёда анча яшадим,
Бир кеча тунай-чи зулматда ёлғиз.
Йўқ-йўқ, чидолмадим, бу ўзи не ҳол,
Тайёр бўлмабман-ку ҳали ўлимга.
Кафандан ечинглар танимни дарҳол,
Жойнамоз беринглар тезроқ қўлимга.!
Создано на конструкторе сайтов Okis при поддержке Flexsmm - накрутить лайки в вк
